Hujjatul-Islam Fadhlu-Llah katika ufunguzi wa Maktaba ya Umma ya Nassiriya, Iraq:

Kwa mujibu wa taarifa ya Ktengo cha Tarjama cha Shirika la Habari la Hawza, Hujjatul-Islam Sayyid Ali Fadhlu-Llah, Imam wa Swala ya Ijumaa Beirut na mwanazuoni mashuhuri wa Lebanon, alifungua maktaba hiyo ya umma katika mji wa Nassiriya akiwa pamoja na kundi la wasomi, walimu, wahadhiri wa vyuo vikuu na wadau wa elimu.

Katika hotuba yake, Hujjatul-Islam Fadhlu-Llah alitoa shukrani zake kwa mafanikio hayo na juhudi zilizofanyika kuyafanikisha, na akabainisha umuhimu wa kazi kama hizo ambazo ni miongoni mwa miradi bora inayochangia kueneza uelewa, kusaidia elimu na kuimarisha utamaduni wa usomaji katika jamii.

Alisisitiza juu ya hatari na hatua nyeti ambazo eneo la Mashariki ya Kati na Ummah wa Kiislamu kwa ujumla viko ndani yake, na akaeleza ukubwa wa changamoto zinazouzunguka, alisisitiza juu ya ulazima wa kuziimarisha jamii zetu ili ziweze kukabiliana na shinikizo na changamoto hizo.

Mwanazuoni huyo mashuhuri wa Lebanon alielezea pia umuhimu wa maktaba hiyo kutokana na wingi na utofauti wa vitabu vyake ambavyo vinajumuisha sekta za Kiislamu, malezi, fikra na historia. Aidha, alisisitiza umuhimu wa lugha ya mazungumzo na mawasiliano kati ya vipengele vya Ummah, pamoja na jitihada za kuimarisha fikra hiyo kwa kusisitiza misingi ya umoja na utofauti kwa pamoja.

Vilevile, alisisitiza umuhimu wa kuimarisha mambo yanayotuunganisha na kuangazia mema na yanayojenga, badala ya kujikita katika tofauti, kwa sababu wale wasiolitakia kheri taifa hili hutumia tofauti hizo kama njia ya kupenya na kuvuruga.

Hujjatul-Islam Fadhlu-Llah alitoa wito wa kupitisha mazungumzo ya Kiislamu, ya kibinadamu, yenye busara, yaliyo wazi na ya kisasa, yanayojengwa juu ya hoja na mantiki, na yenye misingi na vielelezo vitakavyowezesha kukabiliana na changamoto na maswali yanayoibuliwa dhidi ya Uislamu.

Imam wa Swala ya Ijumaa wa Beirut pia alisisitiza umuhimu wa vikao, makongamano na midahalo, na akatoa wito wa kunufaika na mitandao ya kijamii katika kueleza kwa uwazi misimamo ya kidini na kitamaduni, na kuielekeza katika misingi ya wema, kusameheana na upendo.

Mwisho wa yote, Hujjatul-Islam Fadhlu-Llah aliwatakia mafanikio na ustawi wasimamizi wa Maktaba ya Umma, akisema kuwa itakuwa kituo muhimu miongoni mwa vituo vya kueneza uelewa na kushiriki katika maendeleo ya jamii.